Қараңғылық патшалығы және Үміт шамы

Ертеде бір Жарық елі өмір сүріпті. Бұл елде адамдар бақытты, дені сау, көңілді өмір сүретін. Алайда бір күні елге Қараңғылық патшасы шабуыл жасапты. Ол өзімен бірге улы "Тәтті түтін" деп аталатын есірткі әкеліп, елді улап, адамдарды әлсіз әрі бағынышты ете бастаған.

"Тәтті түтін" адамдарға алғашында қызық көрінгенімен, оның артынша барлығы әлсіреп, өмірге деген құштарлығын жоғалтып, жақындарын ренжітіп, өз армандарынан айырылып қалып жатты. Қараңғылық патшасы адамдардың осал тұсын пайдаланып, оларды басқарып, елді өзінің зұлымдық патшалығына айналдырмақ болды.

Бірақ елде бір батыл бала бар еді. Оның аты – Айсұлтан. Ол әкесін "Тәтті түтіннің" әсерінен жоғалтқан болатын. Айсұлтан үмітін үзбей, Жарық елінің ең дана тұрғыны Ақсәуле әжеге барып, кеңес сұрады. Әже оған:

— Үміт шамы деген қасиетті нәрсе бар. Егер сен оны тапсаң, Қараңғылық патшасын жеңе аласың. Бірақ ол шамды тек жүрегі таза, мықты адам ғана таба алады, – деді.

Айсұлтан қорықпастан ұзақ сапарға шықты. Орманды, өзендерді, тауларды артқа тастап, ақыры Үміт шамын тапты. Шамды қолына алған сәтте оның жүрегі мейірім мен үмітке толып, бойына ерекше күш бітті.

Айсұлтан елге оралып, шамды жаққанда, Қараңғылық патшасы әлсірей бастады. "Тәтті түтін" өз күшін жоғалтып, адамдар қайтадан сергек әрі бақытты өмірге бет бұрды. Жарық елі бұрынғыдай нұрлы күндерін қайта тапты.

Айсұлтанның ерлігі елге үлгі болды. Олар енді ешқашан Қараңғылық патшасының арбауына түсіп қалмайтынын түсінді.

Сабақ: Есірткі — уақытша қызық көрінгенімен, артыңнан тек қараңғылық пен қайғы әкеледі. Жүрегіңдегі үміт шамын ешқашан өшірме!

Атенбек Лаура

№270 Ғ.Мұхамеджанов атындағы орта мектебі

Шиелі ауданы